تصدرت الاردن وتربعت على المرتبة الاولى “عربياً” في انها اكثر الدول العربية التي تحصل فيها الحوادث،والشي اللي خافي على الجميع انو مش كل الحوادث قضاء وقدر،صحيح يمكن نصف الحوادث اللي بتصير كلها ناتجة عن مشاكل واخطاء كبيرة،يخاف البعض احيانا من التحدث عنها،لا اعرف السبب لكنني ساتحدث عنها في المقابل.

طبعا الجميع يعرف فيتامين “و” وهو فيتامين الواسطة،ما بخلي شيئ مسكر،كل الابواب بيفتحها،وفعلا مع هذا الفيتامين سترى العجب العجاب،واحد لا بعرف سواقة ولا عمرو مسك “ستيرنج ” وبين ليلة وضحاها بيصير معاه رخصة،طيب يا ابن الحلال،انت ما بتعرف تسوق ولا عندكم سيارة،وكيف في مدة اسبوع تدربت واختبرت فحص سواقة،بحكيلك شطارة،طبعا لما يحكي هيك بكون حمار،لانو بكون مفكرنا عايشين على كوكب المريخ مش على الارض،،،وطبعا الواسطة هي مثل تامين السيارة ،الواسطة تامين شامل،اذا عمل “الحمار” اللي اخذ الرخصة حادث سواء كان الحق معه ام عليه،فانه “يخرج مثل الشعرة من العجينة” ولا كانوا عامل شيئ،مسكين صاحبنا.

خلينا في الراكب وفي السواق وفي مدرب السواقة،المدرب الله يعطيه العافية بكون عايف التنك وبدرب ناس من 10 سنين ويعني قرفان المهنة،وبما انو مدرب فـ مش رح يهمو الا انو يخليك تاخد عندو اكبر عدد من الدروس وطبعا كلو بسعرو،على ايامي كان الدرس بـ 4 دنانير و 75 قرش يعني على حسبة 20 درس (4.75 ×20=95 دينار)وعلشان الضريبة والمدرب بدو يجيب غدا جاهز من البيت فبصيروا 100 دينار عدا ونقدا،،وطبعا على الفاضي بتروح على الدار،خليك اسبوع ما تسوق،بتنسى وين الغيارات.ما علينا منو هاد،ننتقل للسواق،طبعا السواق في الة مرحلتين وهو عم يتدرب وكمان وهو سايق رسمي ،وهو عم يتدرب كل تفكيره وين بدو يروح يسهر هو و “خسته” يعني حبيبته ،ووين بدو يطلع هو واصحابو،وللاسف الشديد انو بكون بدو سارة قبل ما يتدرب،وهو عم يتدرب بتكون السيارة صافة (راكنه) على باب البيت،الآن وهو عم بسوق،فالشعب الاردني هو من ادق الشعوب على وجه الارض،الثانية عند المواطن الاردني الها معنى ولا ممكن ينساها ابدا،،حتى بكون سايق بسرعة،علشان يحلق الطبخة قبل ما تبرد،وعلشان يلحق المحل الفلاني قبل ما يسكر،و ارواح الناس اللي في الشارع ولا الها اي اهمية عندو (الزلمة مدعوم).

ما تبقى الا الراكب،الراكب انا بحط عليه جزء من المشكلة،لاني بشوفهم كثير بكون الشوفير بسوق والراكب نازل حكي حكي،ولك يا ابن الناس اسكت،خلي الزلمة يهرف يسوق،خليه يعرف يركز في الطريق” لع،أبِدْووش ” بدو يضل يلعلع ويرغي،ما علينا..عفوا نسيت احكي عن اللي بعملو الفحص بعد الانتهاء من التدريب وهم الشرطة،نشاما الوطن،وطبعا اللي بيمتحنوا لا نشاما ولا بطيخ،اذا كان المختبر شب،فيا ويل ويلو (الا تبع الواسطة) ،اما اذا كانت بنت فيا حبيبي،من قبل ما يشوف سواقتها في ناجحة،ليش الله اعلم ،وطبعا “الدفع” من تحت الطاولة والواسطة لها كل الدور في هذا المجال.

وحتى لا اظلم فمش دائما كل الشعب بكون غلطان،صح في شريحة معينة (الشريحة الاكبر) وكمان في اسباب تانية على راسها،الاهل والتربية الخطأ والاهمال من طرفهم ،،لكن حسيت انو المجتمع الاردني يحتوي على ظاهرة بغيضة جدا الا وهي الحوادب وكان لا بد من الاشارة اليها،وما دفعني اكثر لاكتب عنها هو حادث السير الذي وقع مع صديقة شقيقة الاختNaryat (فدوى) والتي اتمنى لها الشفاء العاجل قريباً..حزنت عندما قرات نتائج الحادث،فعلا ما يحدث في شوارع الاردن  اصبح لا يطاق،فكل يوم هنالك خبر عن حادث جديد او ربما مجموعة حوادث،،،

اسال الله لكم السلامة…

Browse Timeline

• « كتاب:دوّن من أجل قضية !
• » المدينة الفاضلة …!

Comments ( 11 )

Add a Comment