قَـرَفْ السِـياســة
الناس بتقول:ابعد عن الشر وغنيلو..وانا كمان بشوف هيك،بس لو كان الشر لاحقنا ومش راضي يبعد عنا وين نروح منو؟.
تقريباً هاد مش هو الموضوع اللي بدي احكي عنو،واللي بدي احكي عنه،هو موضوع بالعامية عنوانه “قرف السياسة”،لانو عنجد صارت حياتنا زي الزفت مع السياسة،بنصحى على الاخبار وبنام على الاخبار،قبل الاكل وبعد الاكل،لا،ويا ريت في خبر بخلي الانسان يفرح،الله وكيلكم (وكيل السما والارض) من يوم ما وعيت على هالدنيا وما سمعت خبر سياسي منيح،الا كلها،اسرائيل هجمت على لبنان،شهيد في غزة،توغل في الضفة،تفجير انتحاري في العراق،متمردو دارفور،ومن هالكلام اللي ما بودي ولا بجيب،ولو حتى (بالغلط) حبينا نشوف حالنا وين وصلنا وكم ترتيبنا على قائمة الشعوب،بنلاقي انو احنا في اسفل السافلين.
والمشكلة واللي هي الطامة الكبرى انو احنا فاشلين في السياسة وفي كل مكان مغلوبين سياسياً،واكبر دليل احتلال فلسطين وبعدين لبنان وبعدين العراق،ولسى (كبارنا) او بمعنى آخر (ممثلي الشعب) بيلبسوا هالبدلات و هالـ (جرفتات -بالمصري )ومتعطرين والكندة (بعيد عنكم) بتلمع لمع،وكانو حضرت جنابو رايح على حفلة او رايح على عرس،ومفكر حالو انو الو احترامو و”هيبته” امام الجميع،وهو في الواقع بكون طرطور،ومتل الاطرش في الزفة،لا عارف شو بحكي ولا عارف غيرو شو بحكي ،يعني (خدني جيتك -بالسوري).
خلينا نطلع على اقتصاد دولنا العربية،يا حبيبي،اشي بخزي،ناس بتموت على الخبز،وناس على البنزين،وناس مش لاقية كهرباء،وناس وناس،وشو بدي اعد واحكي،طيب خلينا من الاقتصاد ،بدناش اقتصاد،نشوف الدين،او احكيلكم بلاش الدين (بلاش ناس تزعل) خلينا على الاخلاق (أخف)،كيف الاوضاع عندكم،اكيد متل العمى،الانحلال الخلقي كل يوم عم بزيد والصياعة اكتر واكتر والقانون مش ملحق،لانو زمان كان الواحد بس ينحبس يوطي راسو خجل من الناس،ومن الخوف ما يرجع يكرر اللي عمله،اما اليوم،فسبحان الله،الواحد بنحبس الف مرة،وبيتبهدل،وبينمسح في كرامته الارض وكلو على الفاضي ،ولك يا ابن الناس اتعلم،”لع ،ابديش اتعلم” اسالو ليش اكيد رح يجاوبك : “وشو دخل ربك في الموضوع؟”…وطبعا ما بنسى التعليم اللي كل يوم عن يوم بصير حفظ وتلقين وحشي دماغ،والثقافة برضو،وهي اسخم شي في مجتمعنا ،بطالة وفقر ومرض ،وغيرو كثير اشياء ،بدي سنة حتى اعدها واحكي عنها.
طيب تعال للمسؤولين،احكيلهم ابعدوا عن السياسة شوي وحسنوا اوضاع شعبكم (المسخم)،بحكيلك لأ، تعال للناس اللي عم “بتجعجع” احكيلهم اهتموا في حالكم اول شيئ وبعدين السياسة بحكولك لأ،طيب وبعدين في هالحالة الزفت اللي وصلنا الها،ليش مش راضيين نقتنع انو السياسة الها اهلها ؟ الله اعلم ،يبدو انو في شيطان اسمو سياسة راكبنا…
انا بعترف،انا كنت بكتب عن السياسة وبهتم في السياسة وقنوات الاخبار في التلفزيون كان ترتيبها (1.الجزيرة -2.العربية-3.الاخبارية-4-CNN) بس بعدين بطلت تنفع هالشغلات،صارت كلها مش جايبة همها، خلينا نكون شعوب وناس واعيين ومتحضرين،كلو واحد يهتم بتخصصه ومجال عمله،علشان نبدع فيه ،خلونا نشغل هالـ”بطيخة” اللي بين اكتافنا ولو مرة في العمر،ما رح نخسر شيئ والله.
